اليوم غادي نقدم ليكم طبق يميز المغرب.. و بنييين بزاف.. كل منطقة تتفنن في تحضيره..
غادي نقدم ليكم الكسكس بالدجاج و الخضرة.
المقادير:
1دجاجة تزن 2 كغ
1كغ كرعة حمراء
1كغ خيزو
1 كورة الكرمب
2 بصلات متوسطين
7 حبات بطاطا صغيرة
2 حبات مطيشة
1/2 كغ لفت
الملح؛ الابزار؛ سكين جبير؛ الزعفران عادي، السمن
ربطة صغيرة من القزبر و المعدنوس.
الماء
طريقة التحضير:
1/ في بانيو: السمن + الابزار+ الملح + سكين جبير + الزعفران + 1معلقة كبيرة ماء و نخلط و ندهن الدجاجة.
2/ في طنجرة فوق النار: 1 كاس ماء كبير + الدجاجة+ البصلة مقطعة طريفات + مطيشة مربعات بلا ما نقشروها، نخليو كلشي حتى يتقلى الدجاج لمدة 15 دقيقة.
3/ نقشر باقي الخضرة، و نقطعها على 2 بالطول و نزيل قلب الخيزو.
4/ نقطع الكرعة الحمراء قطع كبيرة مع الاحتفاظ بجزء من القشرة.
5/ نربط القزبر و المعدنوس بقطعة من الثوب او الخيط.
6/ مني تقلى الدجاجة، نزيدو عليها 1،5 لتر ماء ونغطيوها و نخليوها طيب.
7/ مني الطيب الدجاجة نعزلوها و نحطو بلاصتها الخضرة مع مراعات وضع الكرعة الحمراء و الخضراء فوق الكل حيت كات طيب بسرعة.. و نزيدو 3 لتر ماء.و نتركه حتى يبدا يغلى
8/ في قصعة: الكسكس + ربع كاس زيت+ الملح + 2 كيسان صغار ماء و نحربله باليد مزيان باش يشرب الماء، و نضعه في الكسكاس فوق طنجرة الخضرة و نتركه يتبخر لمدة 12 دقيقة في نار هادئة.
9/ مني دوز 12 دقيقة، نصبو الكسكس في القصعة و نرشه ب 2 كيسان ماء و نحربله مرة اخرى و نرده في الكسكاس فوق الخضرة لمدة 12 دقيقة في نار هادئة.
10/ نقوم بنفس العملية للكسكس مرة اخيرة و نتركها 15 دقيقة.
11/ لما ننتهي؛ يكون الكسكس و الخضرة طابو، و إذا كان شي واحد فيهم مازال ما طاب، كان خليوه يكمل طيابو بوحدو.
ملاحظة: إذا جاكم الكسكس ناشف، يمكن ليكوم تزيدو ترشو الماء حتى يرطاب.
12/ نصب الكسكس في الكصعة، و نسقيه بالمرقة، و نعزل الكرعة والبطاطا في بانيو او طبسيل باش مات تعنفجش، ثم نبداو نستفو الخضرة و الدجاج كما في الصورة.
13/ نستف الكرعة الحمراء في الاخير مع البطاطا، و نسقي الكل بالقياس بالمرقة.
14/ نترك الكسكس يشرب المرقة لمدة 10 دقيقة.
شهية طيبة
.
